上回講晒o係考場裡面練習泊位 調頭 斜路停車開車
而家進入 出考場練習考牌路線部份
其實我諗左好耐有咩寫同點寫好
因為元朗係比較冷門o既地方
唔似得其他考場比較市區同大路 d
但係又冇理由叫大家開住 Google Map 睇
算啦
直接跟住行車路線寫
一路諗 一路寫啦
盡量形容一下啦
首先一出考場就係一條雙線雙程路 叫做 涌業路
(第一次聽以為係青衣o既涌美路)
感覺有 d 似沙田醫院去亞公角個段亞公角街咁
不過係 S 形彎路版
條路唔係好闊 冇雙黃線
但兩邊行人路又夠闊
沿途都有 d 私家車泊左o係行人路上面
其實有 d 伏
大車闊身 對 太接近物體 更加敏感
如果 d 車泊得唔好
泊得太近路邊 甚至凸左出黎
就要打燈借隔離線 (借線) 行
如果直接行唔借線
可能俾考官踩停都似 即係肥
借線之前當然要睇埋對頭有冇車
呢條路係出入考場唯一之路
變左一有危機 可能要處理兩次
出一次 入一次
係睇下邊一次係自己借線
另一次就係對頭借線
當然 冇對頭咪冇事
有對頭就小心處理
留意下對頭會唔會已經借左線 擋左條路
變左要早 d 停低 留位俾對頭過
就算對頭出錯 自己都唔可以出錯
考牌一向都係有咩事都係入你數 自己蝕底
行完呢條路就進入東頭工業區
d 路都係雙線雙程多
不過就好闊o既
工業區加上仲有唔少車房
變左周圍路邊都泊晒車
成日都要借線行
都係伏伏地架喇
轉左入單程路 沿路轉右直行就到德業街
o者係九巴 69 968X 龍運 E36A 個總站外面
呢度開始就分兩條線行
一條叫(元朗)工業邨線
另一條叫水邊圍線
兩條線都係東頭工業區行一段路
之後o係宏富苑過山貝河/元朗明渠
去到朗屏邨附近分別去元朗工業邨同水邊圍
之後返轉頭去番考場
先講工業邨線
工業邨線係左轉德業街
跟 268A 968A 過左尚豪庭之後
近球場轉右入番工業區裡面
再去宏富苑過河
之後跟港鐵巴士 K68 去元朗工業邨
不過唔駛兜朗屏商場個邊
工業邨亦都唔係跟足 K68 咁包晒成個工業邨行
只係順時針兜一個細圈
會經過舊時o既九巴元朗廠同工業邨巴士總站外面
之後就過番河去宏富苑
工業邨都係雙線雙程路
不過比起東頭工業區更加闊
如果唔駛借線行
速度要上到 40 至 50 之間
對頭車都會開得快 d
借線o既話要留意會唔會太近對面線
同對頭相遇可能要減速 甚至停低俾對頭過先
離開工業邨去到近山貝河
要右轉一個有停牌 (STOP)
而且好大o既 T 字路口去慢線
即係宏利街右轉宏樂街
個路口未必太多車行
但要穿過三條線先到慢線
都要小心出路口
之後左轉過河去番宏富苑
講番水邊圍線先
水邊圍線係右轉德業街
德業街巴士總站前面係一個油站同的士氣站
少少伏啦
撞o岩的士入氣時間會排晒隊
一路跟 968X 去到朗屏邨總站外面 (當然唔入啦)
之後直去到水邊圍交匯處
兜番落水邊圍邨對面
之後跟 68A 76K 朗屏站左轉
一路直去之後右轉過山貝河去番宏富苑
朗屏邨至水邊圍邨一段
如果順燈的話
速度要上到 40 至 50 之間
不過通常都唔順燈o既
盡量爭取時間上 40 以上啦
有個位我特別有印象
就係跟 68A 76K 朗屏站左轉去惠州學校
即係宏達路左轉宏樂街
係到路口左轉之前
本來係兩條線
臨到近路口
慢線快線不變
但係慢線左邊會另開兩條行車線出黎
一條轉左 另一條轉左或者直行
但係唔係由慢線直接一開三
加上地面畫左虛線
變左需要做過線動作 即係打燈 望鏡等等
先可以駛入去轉左o既行車線
工業邨線同水邊圍線
過完山貝河之後就同一條路
經宏富苑 東頭工業區 涌業路返返入考場
入到考場都未可以鬆懈
因為要右轉兩次路口 (等同調頭)
返到考試o既起點
場內可能有其他學生學緊車
要小心佢地o既動態
係路口佢地會係正線
要確保讓左佢地行先
先可以係安全情況下轉出路口返到起點
拉手掣 入空波 開車門 熄匙
完成考試
考牌路線就講到呢度
仲有一 d 零碎回憶 之後再分享
下回續