上回分享左 踩考牌車 風 brake (煞車) 既情形
而家進入行車部份
開車前準備
扣好安全帶
擰轉頭望下閂好車門未
(就算未閂好 架車都可能行得郁)
校好張凳
試下踩 brake 同油門到最深
睇下腳有冇問題
望下 brake 風錶夠唔夠風
(口試其中一條就係問要幾多風先夠)
望住波段 mon (螢幕) 撳波掣
見到顯示入左波 再確認引擎轉數有變化
(可以聽引擎聲或者睇轉數錶 試過唔知做咩其實入唔到波)
打(指揮)燈
望左右兩邊鏡一次
慢慢鬆晒手掣
(唔知有冇建議 甚至係硬性規定
冇問過師傅 師傅冇話過有問題
純粹個人認為係考牌官面前彈手掣起步 感覺唔好睇
慢慢鬆有操控感 俾人感覺 under control (完全受控)
而且起步好似起得順 d)
架車自己就行啦 (自動波嘛)
(有 d 牌子考牌車好似要俾油先會行)
一開始係考場裡面不停兜圈熟習部車先
油門
馬力比細車大 俾油收油要順
唔係就會 chok 得好明顯
大車係更加明顯 即係油門控制不當
brake
習慣下風 brake delay
試細 brake 大 brake 控制力度
停車拉手掣之後 要慢慢鬆 brake
鬆得急既話
會好似舊時富豪 (Volvo) 巴士咁搖一搖 感覺唔好
軚盤
比細車大 推拉/豬腸軚 轉彎扭軚要多少少幅度既動作
車闊
比細車闊 行正行車線中間更加緊要
車長
比細車長 轉彎前控制好車速
睇尾轆起手扭軚 包住個彎轉 (包彎轉)
轉彎
部車話長唔長 話短唔短
司機位係車轆前面
(其他牌子考牌車好似多數係正車轆上面)
唔可以太早起手扭軚
車身會太接近路邊/物體 甚至尾轆撞壆
又唔可以太遲起手
特別係 90 度彎
就算車慢軚快扭到盡 後半車身都會偏離
包唔夠貼個彎 即係轉彎位置不正確
坊間有一種講法叫做 轉左追右 轉右追左
但係部車冇一般旅遊巴同專利巴士咁長 (10-12米)
唔係太用得著 (參考)
無論個彎急定唔急
都係包彎轉比較直接
尾轆全程保持同彎位一個合理同接近固定 (constant) 既距離
(唔會太窄 又唔會闊到俾電單車攝得入)
初頭係有 d 難
因為平時係 OMSI (遊戲，Der Omnibussimulator，巴士模擬)
玩開香港專利巴士
就算係短車都短極有限 (9-10米)
揸住考牌車 望住鏡都不自覺會遲左起手扭軚
咁就包彎包得唔夠貼
係 OMSI 用過 ADS (九巴 Dennis Dragon 9.9米) 練習轉彎
(因為車頭同前轆距離短 同考牌車相似)
起手扭個下似既
但係部車始終長左 d
後來搵到部外國既短版 Dennis Dart (好似 8 米幾) 練
叫做有 d 參考價值
熟習基本行車之後
就開始係考場練泊位 調頭
未出街 (考場外) 住既
下回續