上回最尾講到
喺揀咗自動波大巴做考牌車
跟住就講點解係喺元朗學同考車
其實就好簡單㗎啫
本身商用車考場就唔多
貨櫃車以外
一般嚟講 都係普遍比較熟悉嘅荃灣同柴灣
只有駕院(香港駕駛學院)係喺沙田同元朗
荃灣德士古道迴旋處
係相當出名嘅考牌必經路線
柴灣就相對冇咁出名
但都有柴灣迴旋處
三手軚調頭喺柴灣 IVE 外面考
(近年柴灣考場好似執過吓
唔知係咪裡面考埋調頭)
Anyway
之前提過
喺希望盡量 low risk d 考到牌返嚟先算
所以喺負擔得到嘅情況下
揀咗駕院
駕院有個好處就係佢有自己場地
泊位、調頭同斜路開車都係喺裡面學同考
除咗落雨之外
幾乎冇街外因素影響 環境非常穩定
網上見喺荃灣同柴灣學
好多時都要跟其他學生排隊練調頭同泊位
駕院可能少人揀
接近係任你練調頭同泊位
練到你腳軟為止
另外就係荃灣同柴灣考場係政府場地
平時係唔可以入到去練習
網上有片段睇到
考嗰陣係超級多人觀戰
(其實都係考生同師傅報到等考試
咁梗係順便觀戰
雖然冇理由多人睇就表現失準
真係載客嗰陣成堆人望住你揸喎)
泊位方面
荃灣同柴灣係泊 S 位
沙田同元朗係泊 L 位
係咪真係 L 位易 d
我而家都唔夠膽答
所以點解駕院個價錢
可以同其他駕駛學校(街校)差咁遠
但某程度上好似又 fair
負唔負擔得起 同值唔值 就見仁見智
坊間成日講
喺駕院考一次牌嘅費用
夠你喺街校考兩次牌
講埋先
我考咗兩次先考到
所以都所費不菲㗎
係咪做咗水魚都係見仁見智啦
的確有人好勁
喺荃灣考棍波大巴都可以 1 take pass
各有各做啦
最後就係講 點解係喺元朗 而唔係沙田
又係好簡單
因為當時駕院唯一一部自動波大巴喺元朗
所以咪焗住去元朗學同考
就係咁
下回續